88.5 %

تمانية وتمانين ونص فالمية

أربعة وعشرين سنة صبر عالمفروض والواقع والحتمية
أربعة وعشرين سنة غلب وضنك وإستبداد والبلد مشتكية
لا زراعة ولا صناعة والتعليم مسألة منتهية
ظلم وفساد وواسطة وتفوه وإخص عالمحسوبية
والناس شقيانا عاللقمة وربنا عالم بحالتها الصحية

تمانية وتمانين ونص فالمية

الزرع باظ والأرض من الكيماوى بقت مهرية
وسيادة النائب على قلبكم قاعد لسة للخطة الخمسية
فين القطن المصرى ياهو فين الفول فين الإنتاجية
فين يامعلم سيد اللحمه فين ياحميدو الثروه السمكية
فين الفاكهة فين الخضار مفيش إلا المسمومة ... دية
وسكينة قالت الزرع والقمح طردوها مالجريدة الرسمية

تمانية وتمانين ونص فالمية

ولو رايح مصلحة حكومية تقول يارب إسترها ويسرها ليا
بس من غير واسطة يا مصرى لازمك فلوس للإكرامية
قالو.. لا... لا .. دة فية إصلاح فى البلد وتنمية إدارية
ووزارة ورا وزارة رايحة ماتاخدش غير كدب وأذية
ومسئولين من غير ذمم ويعرفوش ريحة الإنسانية
وأنا وإنت صابرين على المفروض والحاله الردية
ويقولو إزاى دا إحنا هنظم دوره الكورة العالمية
وجت لجنة الفيفا مصر تزور وشافت الوكسة الحقيقية
كاس عالم مين يابا دة إحنا حيااللة ....حكشجية
شايفين المصيبة و الغم شايفين سواد السحابة السنوية

تمانية وتمانين ونص فالمية

ووزارة لا بالتعليم ولا بالتربية مهتمية
والفلوس تنصرف وتتوزع عالجهات السيادية
ولا بحث علمى تسمع عنة ولا جامعات فى القايمة العالمية
حضانة إبتدائى إعدادى ثانوى جامعية كلة دروس خصوصية
فين الملاعب والساحات فين النوادى الشبابية
فين الفصول فين المعامل فين المدرس ياإبر مصدية
أجيال ورا أجيال متعرفش غير شاكيرة والخيبة قوية

تمانية وتمانين ونص فالمية

وزمان قالو شدو الحزام عشان نبنى المصانع المصرية
ودلوقتى خسرانة كسبانة إتباعت بتلات أبيض وشوية
لا أخدو رأيك ولا رأيى ولا حتى أحمد إبن هنيــه
يردو..لا..فى البرلمان إتناقشت ووافقت الأغلبية
حرام عليكم دم الغلابة تبيعوه لا أعرف شكك ولا نقدية
لا..لآ إحنا عملنا توشكى والنبى إية؟...عينك فى عنيه
دة البترول رهنوه والغاز باعوه ومفضلش غيرالهوا والمية

تمانية وتمانين ونص فالمية

وشارون لوحده بيتصرف خلاص ياعبده ضاعت القضية
والسودان حروب ومجاعة ومؤامرات مكشوفة ومستخبية
ومين الحاكم ياإبنى فى لبنان بيريز ولا سوريا ولا اللبنانية
والدور عليكى ياسوريا ولا على مفاعلات إيران النووية
والعب من تحت لتحت شغال فى الصحراء المغربية
ومتخلفين بيعملو عمليات إنتحارية ويدبحو الناس عالفضائية
وهى دى مقاومه؟ متعرفش دول موساد ولا مخابرات أمريكية
وإحنا فين من كل ده يا فرعون الصمت والخنوع والمواريه

تمانية وتمانين ونص فالمية

وإسم النبى حارسة وصاينة عندة المؤسسة المالية العالمية
راسمالها 600 مليون دولار والباقى فى البنوك السويسرية
النكتة قالت مالمصروف حوشهم مش مالقروض المصرفية
وله لجنه سياسات تقرر وتنفذ ده هو القيادة السياسية
مين قالك هيحكم بعد أبوه أومال مين متحكم فيك وفيَة
فساد مين قال؟! دة فية "كمال" تحت القبة البرلمانية
رجب عامل جاكوزى للمية وملايين مشفوطة مالصحف القومية
فلوس وهدايا وساعات ذهبية ورشوه فيلا فى السواحل الشمالية
ونافع ورث الأهرام هو وعياله وعنده قصور فى القرى السياحية
وإيه يعنى لما ياخد شوية والمال سايب بيخر مالحنفية
وطبل وزمر ومؤتمرات شعبية وتبقى البلد للحرامية
وياصبرى لو عاوز قرض ولا وظيفة إبقى قابلنى عالزراعية

تمانية وتمانين ونص فالمية

وليه يامصرى عايز ديموقراطية وإزاى تحلم ياواد بالحرية
ده لازم نعيش ياوله فى طوارئ وتفضل راسنا كده موطية
والشعب محتاج لقياده خبيرة ومبيفهمش المصلحة الوطنية
ولية ياناس الظلم ده ؟ وفية فالبلد بدل القانون ألف و مية
لية البهدلة والذل والعبودية والمظاليم فالإحتياطى مرمية
من غير تهمه ولا تحقيق و لا محكمة ولا حتى قضية
مشاكل بالهبل ومحاكم زحمة وقضايا الرول ألفين وتلتمية
وإكسب ياحبيبى القضيةبس قابلنى فى العليا ولا الإدارية
ياخبر إسود ومهبب المتهمين ماتو إتخنأو فى العربية
فين المسئول؟ مين يتحاكم ؟ هس ياواد دى تبع الداخلية
وده أتوبيس فى الريَاح وجرار بالعيال إنقلب عالزراعية
مفقود إلى مسافر عالصحراوى ومولود إلى وصل الناحية التانية
والناس إنحرقت فى القطر والحكومه قالت دى الجزرة مهريه
دى تلامه وقله إحساس لا دى جريمة وهروب مالمسئولية

تمانية وتمانين ونص فالمية

فين الثقافة فين الإبداع فين الفن والسنما المصرية
وتسأل مين محمد على؟ يقولك ده إلى بنى الحلمية
وعارف يابنى حقوقك؟ وإية فايده المجالس المحلية؟
طب عارف يابنى واجبك؟ وإزاى تفيد الحياه النيابية ؟
يقولك معلش ونبى ياخال سيبنى ألحق التمسلية

تمانية وتمانين ونص فالمية

والسياحة فين؟ وضايعة لية ودبى عندها ملايين تمانية
ومصر فيها الهرم والنيل والبحور والأثارات الفرعونية
أصل الحاله هى هى فى المطارات والموانى المصرية
والسايح يجى مصر لية وهو بيتبهدل فى كل سانية
والتاكس مخلع ومبهدل والإسطى لسانة فرقله
والشارع حاجة تقرف وتكسف فى المزارات السياحية
تركب يامسكين بجنية والنزول بالبقشيش والعمله الأجنبية

تمانية وتمانين ونص فالمية

والشعب غلبان مطحون يابنى 35 فى المية أُمية
وفى الراديو يقولك مبارك مين غيره فى الفتره الجاية
وكفاية كفاية يآآوح ويقول الدستور مش محتاج لعناية
وكفاية كفاية كفاية طيب يسرورغير76 ونعمل التمثلية
وترشيحات وأحزاب مغمورة نازلة فى الحملة الإنتخابية
ونور وجمعة وشلتوت ومش فاكر مين فى المسرحية
ولجنة إنتخابات متنأية وطبعا فوق المساءلة القانونية
ونسمح بالتزوير ولا لأه ورأيك إية فى الرقابة الدولية
ولية تخاف يا عمرو تقلق والإشراف للهيئات القضائية
وإية يعنى لما يبعـــــدو من القضاه ألف وخمسمية
لازم برضة تقول رأيك وتروح اللجنة الإنتخابية
ومبارك نمرة واحد وكشوف بأسماء ناس متوفية
ويوم سبعه وعدو سُمعة و الغلابه بكباب ولوتارية
ولو نص الناس راحو كنا قلنا صحيحه وشرعية
وتسأل السباك والسواق والبواب وبتاع الطعمية
والدكتور والمهندس فريد وجرجس وأحمد والمحامية
يقولك طهقنا خـــلاص وبندور عالهجرة الشرعية
الكل حاسس وعارف حال البلد يصعب عليك وعلىَ

تمانية وتمانين ونص فالمية

صعبانة على بلدى خصوصا لما شوف التجربة الماليزية
مش ممكن يجينا يوم مهاتير مخلص لأجل الغلابة دية
ده قنديل كتب عن "التغير" إتبهدل وراح فى شربة ميه
والحاجه تقول أنا خايفه عليك ياإبنى وعلى حالتك الصحية
طيب نعمل إية والحاله تفوَر الدم وتجيب السكتة القلبية
إدعى معايا وقول يارب إرحم عبيدك من ولاد المفترية

تمانية وتمانين ونص فالمية

By my dear friend ZE